समाचार

२० वर्षमा अञ्जु पन्तको एकल साँझ, ‘मेरो देशको माया छ’

काठमाडौं, २५ भदौ ।  शिर झुकाएर आमाको आशीर्वाद लिएपछि अञ्जु पन्तले पहिलो गीत गाइन्, ‘मेरो देशको माया छ’ । शब्दलाई गहिरो अनुभूतिसहित पस्किनु उनको गायनकौशल हो । २० वर्षे गायनयात्रामा पहिलोपटक एकल साँझमा प्रस्तुत भएकी उनको यो कौशल पहिलो गीतबाटै दर्शक श्रोताले महसुस गरे । आमाको हात समाउँदै मञ्चमा प्रवेश गरेकी अञ्जु नीलो र सेतो ‘कम्बिनेसन’को सारीमा खुलेकी थिइन् । मञ्च पनि सेतो र नीलो रङको संयोजनमा आकर्षक देखिएको थियो ।
मञ्चमा उनको आगमनसँगै भरिभराउ हलमा गुञ्जिएको तालीको गडगडाहट उनको पहिलो प्रस्तुतिपछि पनि उत्तिकै जोशिलो थियो । संगीतयात्रामा उनलाई स्थापित गर्न र संगीत क्षेत्रमा टिकाइरहन सघाएका गीतहरू शनिबारको साँझ प्रज्ञाप्रतिष्ठानको हलमा प्रस्तुत भए । गीतसँगै जीवनयात्राका अनुभूति सुनाउँदै अञ्जुले भनिन्, ‘जति उतारचढाव आए पनि मेरो लागि संगीतयात्रा एकदमै स्वर्णिम भयो ।’
साँझमा ‘कसले चोर्‍यो मेरो मन’ उनको दोस्रो प्रस्तुति थियो । ‘एक पल पनि तिमीबिना बाँच्न सक्दिनँ’ तेस्रो प्रस्तुति । यो गीतसँग उनको जीवनको महत्वपूर्ण याद जोडिएको रहेछ । संगीतकर्मी फत्तेमान राजभण्डारीको एकल साँझमा उनलाई साथ दिन अञ्जु चुनिएकी रहिछन् । त्यति बेला संगीतकार रञ्जित गजमेरको मनमा अञ्जुको स्वर गड्यो । दुई महिनाकी सुत्केरी अञ्जुको घरमै गएर रञ्जितले यो गीत अभ्यास गराएका रहेछन् । ‘यो गीतसँग मेरो भावनात्मक सम्बन्ध छ, रञ्जित गजमेरप्रति समर्पण गर्न चाहन्छु’, अञ्जुले भनिन् । फत्तेमानकै अर्को गीत ‘यस्तो पनि हुँदो रैछ’ पनि उनलाई समर्पण गर्दै अञ्जुले गाइन् ।
भजनबाट गायनयात्रा सुरु गरेकी अञ्जुले एकैछिन आध्यात्मिक माहोल पनि सिर्जना गरिन् । ‘मनवा मन नै योगी बनाउ’ सुन्दा प्रज्ञाप्रतिष्ठानमा कुनै धार्मिक अनुष्ठान चलिरहेजस्तो भान भयो । पहिलो चरणमा ‘म यस्तो गीत गाउँछु’, ‘पलपल रोएँ जिन्दगीमा’, ‘तिमीले पराई ठानेपछि’ लगायत आठवटा गीत गाइन् । दोस्रो चरणमा रातो गाउन र गोल्डेन आउटरमा सजिएर स्टेजमा देखा परिन् । कपालमा झलल सजिएका ‘एसेसोरिज’ले उनको सुन्दरतालाई अझै बढाएको थियो । ‘सुनकोसी सुसेलेको’, ‘तिर्खा लाग्यो पानी खाएँ’, ‘गोर्खा पल्टन’जस्ता डान्सिङ बिटसहित ‘न बिर्र्सें तिमीलाई’, ‘तिमीबिना एक पल पनि’, ‘तिमी कसको हुने होला’लगायतका मेलोडी नम्बर पनि सुनाइन् ।
‘सुर्के थैली खै’ गीत पस्किएर पूर्वसूचनाबिना नै कार्यक्रमको ‘सरप्राइजिङ’ अन्त्य भयो । उनलाई दुई गीतमा गायक सुरेश लामाले साथ दिएका थिए । अहिलेसम्मको गायनयात्रामा लगभग ६ हजार गीत गाइसकेकी अञ्जुले कार्यक्रममा करिब अढाई घन्टामा १७ वटा गीत प्रस्तुत गरिन् । अञ्जु पन्त फाउन्डेसन र रेकर्डिस्ट एसोसिएसनले आयोजना गरेको कार्यक्रमबाट संकलित रकम अञ्जुले यी दुवै संस्थालाई प्रदान गर्नेछिन् ।

उस्तै उस्तै खबरहरु

  • वासिंटन डिसीमा नेजाको अन्तरक्रिया, नेपाली दुतावासमा कर्मचारी अभाव भएको गुनासो

    वासिंटन डिसीमा नेजाको अन्तरक्रिया, नेपाली दुतावासमा कर्मचारी अभाव भएको गुनासो विश्व प्रेस स्वतन्त्रता दिवस मे ३ मा अमेरिकाको डीसी मट्रो क्षेत्रमा अवस्थित अमेरिकाका लागि नेपाली दूतावासको कार्यालयमा राजदूत प्रा. श्रीधर खत्रीसँग नेपाल अमेरिका पत्रकार संघ (नेजा) ले अन्तरक्रिया गरेको छ । सो अन्तरक्रियामा राजदूत प्रा‍. खत्रीले दूतावासले आफ्नो स्रोत र साधनले भ्याएसम्म सेवा प्रवाहमा विशेष ध्यान दिइरहेको बताउनुभयो ।

  • ग्रेटर न्यूयोर्क नेपाली चेम्बर अफ कमर्शको अध्यक्षमा प्रदीप श्रेष्ठ

    ग्रेटर न्यूयोर्क नेपाली चेम्बर अफ कमर्शको अध्यक्षमा प्रदीप श्रेष्ठ न्यूयोर्क । अमेरिकाको न्यूयोर्क आसपासमा व्यवसाय गरिरहेका नेपाली एवं नेपाली मूलका अमेरिकी व्यवसायीहरु संगठित भएका छन् । उनीहरुले ग्रेटर न्यूयोर्क नेपाली चेम्बर अफ कमर्श गठन गरेका हुन् । न्यूयोर्क, न्यूजर्सी र कनेक्टिकट राज्यमा व्यवसाय गर्ने नेपाली एवं नेपाली भाषी व्यवसायीहरु संलग्न रहेको यो संस्थामा ७४ वटा व्यवसायिक कम्पनी आवद्ध भएका छन् । एक वर्षसम्मको तयारीपछि गरिएको साधारणसभाले प्रदीप श्रेष्ठको अध्यक्षतामा सात सदस्यीय कार्यसमिति निर्वाचित गरेको छ ।

  • नेवाः गुठी न्यूयोर्कले मनायो विश्व नेवाः दिवस

    नेवाः गुठी न्यूयोर्कले मनायो विश्व नेवाः दिवस न्यूयोर्क । नेवाः गुठी न्यूयोर्कले सातौं विश्व नेवाः दिवस विशेष कार्यक्रम गरी मनाएको छ । गुठीका अध्यक्ष विजयमान सिं को अध्यक्षतामा भएको उक्त कार्यक्रममा विभिन्न संघसंस्थाका प्रतिनिधिहरुले शुभकामना मन्तव्य व्यक्त गरेका थिए । कार्यक्रममा नेपाली महावाणिज्य दुतावासकी उपवाणिज्य दुत संगिता न्यौपाने, न्यूयोर्कका लागि पर्यटन प्रबर्द्धक एवं पत्रकार गोकुल श्रेष्ठ, आदिवासी जनजाति महासंघ, अमेरिकाका अध्यक्ष तोरण गुरुंग, हिमालयन बुद्धिष्ट कम्युनिटीका अध्यक्ष हृदय तुलाधर, नेवाः गुठीका संस्थापक एवं सल्लाहकार विके नेवाः र गुठीका संस्थापक अध्यक्ष, सल्लाहकार एवं विश्व नेवाः अर्गनाईजेशनका सल्लाहकार आदित्य महर्जनले विश्व नेवाः दिवसको उपलक्षमा शुभकामना मन्तव्य व्यक्त गर्नु भएको थियो ।

  • ललितपुरका मयेर चिरिबाबुलाई न्यूयोर्कमा स्वागत

    ललितपुरका मयेर चिरिबाबुलाई न्यूयोर्कमा स्वागत न्यूयोर्क । अमेरिका भ्रमणमा रहनुभएका ललितपुर महानगरपालिकाका मेयर चिरिबाबु महर्जनलाई नेवाः गुठी न्यूयोर्कले स्वागत गरेको छ । न्यूयोर्कमा आयोजना गरिएको कार्यक्रममा गुठीले मेयर महर्जनलाई स्वागत तथा सम्मान गरेको हो ।

  • नेजाको साधारण सभा बोस्टनमा

    नेजाको साधारण सभा बोस्टनमा नेपाल अमेरिका पत्रकार संघ (नेजा) ले आफ्नो १७औं साधारण सभा म्यासाच्युसेट्स राज्यको बोस्टन सहरमा गर्ने भएको छ । टेक्सासको अस्टिनमा भएको नेजाको बैठकले आगामी मे २५ र २६ मा आफ्नो १७औं साधारण सभा गर्ने निर्णय गरेको जनाएको छ । साधारण सभाका लागि नेजाका क्षेत्रीय संयोजक (उत्तर–पूर्व) सुपेन्द्र बस्नेतलाई संयोजक चयन गरिएको महासचिव बाबुराम दाहालले जारी गरेको बक्तव्यमा उल्लेख छ ।

  • तेश्रो लगानी सम्मेलनका लागि अमेरिकी लागनीकर्तालाई महावाणिज्य दुतावासको आव्हान

    तेश्रो लगानी सम्मेलनका लागि अमेरिकी लागनीकर्तालाई महावाणिज्य दुतावासको आव्हान अमेरिकी व्यवसायी एवं लगानीकर्तालाई नेपालमा हुन लागेको तेश्रो लगानी सम्मेलनमा सहभागि हुन नेपाली महावाणिज्य दुतावास न्यूयोर्कले आव्हान गरेको छ । न्यूयोर्कस्थित महावाणिज्य दुतावासमा हिजो आयोजना गरिएको “नेपालमा व्यापार, पर्यटन र लगानीका अवसरहरू“ विषयक गोलमेच छलफलमा कार्यवहाक महावाणिज्य दुत विष्णु प्रसाद गौतमले यस्तो आग्रह गर्नु भएको हो ।